बागवानी विकास केन्द्र, बोंच, दोलखाको वेभसाइटमा यहाँलाई हार्दिक स्वागत छ

वि. सं. २०३४ सालमा पहाडी क्षेत्रमा विशेष गरी फलफूलको विकास र विस्तार गर्ने मुख्य उद्देश्यका साथ स्विस सरकारको आर्थिक सहयोगमा सन्चालित सघन पहाडी विकास आयोजना (Integrated Hill Development Project) ले बोच गा. वि. स. वडा नं. ०५, दोलखामा यस बागवानी विकास केन्द्रको स्थापना गरेको हो। वि. सं. २०४५ सालमा यस केन्द्रलाई सघन पहाडी विकास आयोजनाले कृषि  विभागलाई हस्तान्तरण गरेपछि वि. सं. २०६१ सालसम्म विभाग अन्तर्गत बागवानी केन्द्रको नामले विभिन्न सेवा प्रवाह गरेको थियो।वि. सं. २०६१ सालमा तत्कालिन कृषि तथा सहकारी मन्त्रालय मातहतका निकायको संगठनात्मक संरचना परिवर्तन गर्ने क्रममा मुख्य कार्य शितोष्ण फलफूलको रुटस्टक उत्पादन गर्ने भनि जिम्मेवारी तोकेर यस केन्द्रको नाम परिवर्तन गरि शितोष्ण फलफूल रुटस्टक विकास केन्द्र नामाकरण गरियो।देश संघीय संरचनामा जादै गर्दा वि. सं. २०७५ सालमा यस केन्द्रलाई बागमती प्रदेशको कृषि तथा पशुपन्छी विकास मन्त्रालय अन्तर्गत रही सेवा प्रवाह गर्ने जिम्मेवारी दिइयो। आ. व. २०८०/८१ मा कृषि तथा पशुपन्छी विकास मन्त्रालयले बनाएको नँया संगठन संरचना तथा दरबन्दी तेरिज अनुसार यस केन्द्रको नाम परिवर्तन गरि बागवानी विकास केन्द्र राखियो।हाल यस केन्द्रको कमाण्ड क्षेत्र बागमती प्रदेशका तीन जिल्लाहरु सिन्धुपाल्चोक, दोलखा र रामेछाप तोकिएको छ।

भिमेश्वर नगरपालिका वडा नम्बर ०८, बोचमा अवस्थित यो केन्द्र काठमाण्डौबाट करिब १२० किलोमिटर सडक दुरीमा रहको छ। यो केन्द्र सामुन्द्रिक सतहदेखि करिब २१०० मिटर उचाईमा अवस्थित छ।काठमान्डौबाट यस केन्द्रसम्म पुग्न अरनिको राजमार्गको खाडीचौर हुदै तहाँबाट लामोसाँघु-जिरी सडकमार्गको यात्रा तय गर्नु पर्छ। खाडीचौरबाट करिब ४२ कि. मि. तथा चरिकोट बजारबाट करिब १३ कि. मि. सडक दुरीमा यो केन्द्र रहेको छ।